KALIBO, Aklan — Nagpangayo it panibag-ong 20 week extension extension ro contractor nga Rotaflex Construction and Development Corporation para matapos ro konstruksyon it bag-ong Kalibo Public Market.
Bangud kara, ginpahayag ni Sangguniang Bayan member Ronald Marte, member it committee on infrastructure nga uman nga nadismaya ro pilang vendors matapos ipahayag it nasambit nga kompanya ro panibag-ong hinyu para sa pagpaeawig it completion deadline it proyekto.
Ginrason sigon nanda nga owa pa natapos ro design it mga ginpa-revise nga parte it tindahan particular ro adjustment sa eapad it mga stalls.
Dugang pa ni Marte nga kon minatud-on hay pwedeng kasuhan ro contractor bangud sa pag-eabag sa kontrata eabi eon ro kapas-eawan sa pagsunod sa anang date of completion.
Apang raya hay ginatugyan nanda sa office of the mayor.
Natukiban pa sigon nanda sa andang pag inspection nga umpisa ko buean it Marso hay nagpundo eon ro trabaho bangud sa kawad-an pa it bag-ong design.
Raya hay nagapakita sigon nga owa it nagakaigo nga monitoring ag koordinasyon ro proyekto halin sa Municipal Engineering Office.
Madumduman nga unang target nga matapos ro P300-milyong proyekto ko 2024, apang pilang beses raya nga nadelay.
Sa pinaka-ulihing report it lokal nga gobyerno it Kalibo, ginaboeobanta nga una eon sa 85 porsyento ro natapos sa konstruksyon it tatlong panaegan nga pampublikong tindahan.
