Ginkumpirma it Philippine Consulate General sa New York nga uwa it Pilipinong nadamay ukon naninahan sa nag-siklab nga maeawigang wildfire sa Ocean County, New Jersey.
Suno kay Consul General Senen Mangalile, maid-id nga ginasunaynayuan it Konsulada ro sitwasyon idto umpisa kat nag-siklab ro kaeayo ag nagsumite eon man sigon sanda it opisyal nga report sa Department of Foreign Affairs (DFA) sa Maynila para sa updates sa insidente.
Ginengganyo man it Konsulada it Pilipinas ro mga miyembro it Filipino community sa mga apektado it wildfire nga magpabiling alerto ag sundon ro mga abiso halin sa mga lokal nga awtoridad.
Ginlaygayan man ro mga Pilipino idto nga magakinahangean it bulig ukon gusto nga magpaabot it andang concern nga tumawag it direkta sa Konsulada.
Una kara, base sa mga lokal nga awtoridad sa New Jersey, nag-umpisa ro wildfire ku adlaw it Martes, Abril 22 sa may Greenwood Forest Wildfire Management Area.
Madasig nga kumalhit ro kaeayo sa libu-libong ektaryang kagubatan nga nagtuga it pag-evacuate sa mga kaiping nga residential areas.
Sa pinakahuling update sa wildfire, ginabueubantang una sa 50% it wildfire ro natapna eon.
Sa sangka press conference, hinambae ni New Jersey commissioner of environmental protection Shawn LaTourette nga ro nasambit nga wildfire ro pinakamabahoe nga nalistana sa estado umpisa ku Mayo 2017 nga tumupok eon sa 17,000 ektarya.
