KALIBO, Aklan—Ginahueat pa makaron it lokal nga gobyerno it Kalibo ro resolusyon it National Task Force on Covid-19 agud nga makabaeay it executive order kaangot sa mandatory nga pagsuksok it face shield kon nagasueod sa mga establisyimento komersyal.
Suno kay Kalibo mayor Emerson Lachica, kon raya ro nagakaangay ag bagay nga himuon agud nga mas eabi pang malikawan ro virus nga nagadaea it makataeapon nga sakit hay magasunod ro lokal nga gobyerno.
Apang, sa makaron sa munisipyo sigon hay nakadepende sa mga empleyado kon isuksok it mga raya ro andang face shield ro importante hay nakasuksok sanda it face mask sa tanan nga oras eabi eon kon nagatransaksyon sa mga kliyente.
Sa banwa it Kalibo suno kana hay ginasunod ro mandatory nga pagsuksok it face shield kon nagasakay sa mga pampublikong saeakyan.
Samtang, ginlaygayan ni mayor Lachica ro mga indibidwal nga magkaibahan sa sueod it baeay nga magbueo sanda it certification sa barangay agud nga libreng magkaangkas sa motorsiklo.
Nasayuran nga ginpasugtan eon it IATF ro backrider sa motorsiklo maskin uwa it barrier provided nga magkapamilya sanda ag mag-kabaeay.
