KALIBO, Aklan—Matapos ro haeos daywang dag-on nga pagpundo it aktibidad it lokal nga gobyerno it Kalibo sa kada selebrasyon it kapyestahan ni Sr. San Juan de Bautista, uman raya nga ginbalik partikular ro larong lahi sa pastrana park nga gindagsa it maabong tawo.
Suno kay Maranatha Estrada-Vargas, Community Affairs Officer II it MEEDO – Public Affairs Information and Communication Division nga gintinguhaan it munisipyo nga mapatigayon ro nasambit nga aktibidad para sa kasadyahan it tanan.
Tuyo kara nga makabulig sa mga kasimanwa nga nagakalisod tuga it pandemya.
Ro pila sa mga pahampang nga ginpatigayon it LGU hay ro pokpok palayok nga may premyo nga 500 pesos cash, paghakwat it 25 ag 50 kilos nga bugas, daeakpan it orok ag pato, sack race, tug of war ag maabong iba pa.
Ko una sigon ro andang target sa mga pahampang hay mga onga apang makaron nga dag-on hay ginlevel up nanda raya kon siin gindugangan ro kategorya para sa mga magueang.
Ginpahayag dugang ni Vargas nga mabahoe ro andang pasaeamat sa tanan nga nagbulig sa pag-organisa it nasambit nga aktibidad bangud nga nakit-an ro eubus nga kasadya sa hitsura it mga nagtambong.
