KALIBO, Aklan—Sigidas makaron ro ginahimo nga pagpahaum it lokal nga gobyerno it Kalibo para sa igatao nga insentibo sa mga pumueoyo nga magapabakuna it booster shot.
Suno kay Kagawad Mark Sy it Brgy. Poblacion, Kalibo nga nagpatigayun it pueong kahapon ro Municipal Health Office ag LGU para ma-istoryahan ro pagpabaskog it rollout it bakuna.
Sambilog sigon ro pagtao it insentibo sa naisip nga pamaagi ni Mayor Juris Bautista Sucro para ma-engganyo ro mga pumueoyo nga magpa-booster.
Sa makaron, nagapadayun ro pagputos sa mga food pack sa opisina it Municipal Social Welfare and Development (MSWD).
Ginakaeakipan sigon raya it dekalidad nga klase it bugas, noodles, de lata, kape, gatas ag iba pa.
Sa pihak nga parte, may ginpahaum man nga food packs ro lokal nga gobyerno para sa mga pasyente nga nagpositibo sa COVID-19.
Mag-euwas kara, plano pa sigon it alkalde nga magtao it sangka kit nga kompleto it mga gamit nga kinahang-eanon it sangka pasyente.
Base sa pinakaulihing datus, 11 pa ro nabilin nga aktibong kaso sa banwa it Kalibo.
