KALIBO, Aklan—Nakaangkon it libreng konsyerto sa Kalibo Pastrana Park para sa selebrasyon it Valentine’s Day makaron nga Pebrero 14, 2026.
Raya hay kada dag-on nga ginapangunahan it lokal nga gobyerno it Kalibo para magtao it kasadyahan sa mga gustong iselebrar it libre ro okasyon.
Naging bisita ro singer nga si Earl Agustin nga nagharana ag nagpasadya sa mga tumaean-aw.
Suno kay Jay-Ar Arante, head it LGU Kalibo media affairs, tuyo it lokal nga gobyerno nga bukon eamang it mga kalibonhon ro mataw-an it kasadyahan sa nasambit nga okasyon kundi maging ro mga pumueoyo it kaeapit nga banwa.
Raya hay nag-umpisa bandang alas-6:00 it gabie ag posibleng matapos bandang alas-12:00 it tungang gabie.
Nasayuran nga ro Valentine’s Day kada Pebrero 14 hay ginaselebrar it mga couple ag miyembro it pamilya pinaagi sa pagkaon sa mga restaurant, pagtaeaw-an it regalo kaparehas it bueak, chocolates, teddy bears ag iba pa.
Apang ro pinaka-highlights kara hay ro pagpasidungog kay St. Valentine, sangka pari ku ika-tatlo nga siglo sa Roma apang nakulong bangud sa pag-eabag sa kasuguan it emperador nga indi magkasae it mga soldado ag mga nobya kara.
