KALIBO, Aklan — Gin-akusahan it mga residenteng naga-istar sa Wetland No. 6 sa likod it Talipapa Bukid sa isla it Boracay ro local government unit (LGU)-Malay ag Department of Environment and Natural Resources (DENR) it human rights violation bangod sa gin himung demolisyon sa andang mga baeay nga owa pa it relokasyon.
Sa interview it Bombo Radyo, ginhambae ni Mrs. Maureen Tapican nga haeos 15 anyos eon nga naga-istar sa lugar nga ginpromisahan sanda nga antes paga bue-on ro mga illegal occupants ag mga istraktura, pagataw-an anay sanda it relokasyon nga kaparte it wetland rehabilitation plan.
Umpisa kahapon hay ginputoe eon it LGU-Malay ro linya it tubi ag kuryente sa haeos 30 baeay nga apektado it demolisyon.
Mag-eowas kara, gin-abisuhan sanda nga ro mga tubong-Boracay eamang ro pagataw-an it relocation sa mainland Malay.
Apela nanda sa gobyerno nga mataw-an it maayos nga relocation site.
Nasayuran nga seryoso ro inter-agency task force nga mataw-an it solusyon ro overpopulation sa 85 pamilyang naga-istar sa wetland area sa Boracay.
Sambilog ro Lucio Tan group sa mga nagabulig makaron sa biodiversity conservation and rehabilitation sa Wetland No. 6.
