KALIBO, Aklan—Haom eon ro lokal nga gobyerno it Malay sa ginaeauman nga pag-aeabutan makaron nga adlaw it mga lokal nga turista nga magahalin sa mga kaeapit nga probinsya sa bilog nga Western Visayas.
Raya hay matapos nga gin-aprubahan it Boracay Inter Agency Task Force (BIATF) ro uman nga pagbukas it isla makaron nga adlaw, Hunyo 16 sa mga domestic tourist.
Suno kay Malay Mayor Frolibar Bautista, kinahang-ean eamang nga magpresenta it Identification card ag booking document ro mga bisita sa pag-abot nanda sa Caticlan Jetty port agud nga pasugtan sanda nga makatabok sa isla.
Sa 390 nga DoT-accredited accommodation establishment nga may una sa isla hay tatlo pa eamang kanda ro nataw-an it Certificate of Authority to Operate ukon CAO.
Gin-insister it alkalde nga hugot nga igapatuman ro no booking, no entry policy bilang pagsunod eon man sa mando it task force.
Agud nga matuman ro pag-obserba sa physical distancing hay may gindisignar nga tatlong ka linya para sa mga workers, residente ag turista.
Nasayuran nga haeos daywang buean nga nagpahuway ro isla tuga it Covid-19 pandemic.
