KALIBO, Aklan—Nagtukod it satellite office ro lokal nga gobyerno it Malay sa isla it Boracay agud nga mapadasig ro pagproseso it dokumento it mga negosyante nga maga-renew it andang business permit makaron nga Enero.
Suno kay Dennis Briones, licensing officer it LGU-Malay ro nasambit nga satellite office hay nahamtang sa barangay hall it Balabag.
Ginpahayag dugang nga pwede eon nga makaproseso ro mga negosyante it andang requirements ag application pinaagi sa online, kun sa siin may anda eon nga mga option.
Sa makaron ro deadline hay nakataeana sa Enero 20.
Apang nakadepende sa sangguniang bayan kon makapaguwa it resolution agud nga makaangkon it extension ro deadline.
Sa pihak nga parte, ginpahayag ni Briones nga pabor imaw sa proposal it SB Malay nga padali-on ro proseso it mga requirements ag duea-on ro ro ibang mga dokumento para sa mga maintok nga mga negosyante sa Boracay.
Nasayuran nga sa makaron hay pareho it ginapangayo nga requirements sa mga small business sa isla kapareho it mga sari-sari store sa mga mabahoe nga hotels ag resorts nga nagatuga it kalisod ag pagkaduea it gana sa mga maintok nga negosyante.
Engkaso nga maipasa ro ordinansa, posibleng sa masunod nga dag-on pa raya igapatuman.
Sa pihak nga parte, gindugang pa ni briones nga uman nga nagbalik ro mabaskog nga pagnegosyo sa isla matapos nga uman nga nagbukas ro mga nagsarado nga negosyo ko tiempo it pandemic.
