Kalibo Aklan ———Uman nga gin-engganyo it Local Government Unit ukon LGU sa banwa it Malay ro mga turista nga magbisita sa bantog ag ginkilaea bilang Top 2 sa mga best beaches sa bilog nga kalibutan nga Isla it Boracay.
Suno kay Malay Acting Mayor Frolibar Bautista nga makarun hay nagapabilin nga COVID-free ro Isla rason nga euwas raya para sa mga gustong magpamasyar ag magbakasyon kaibahan ro andang pamilya.
Ginapahayag dugang nga makarun hay mabahoe ro ginatao nga discount it mga hotel ag resort.
Bangud kara, manami suno pa kana nga magtake advantage eun ro mga turista.
Maskin nga medyo may kamahaean sigon ro RT-PCR test hay mabawi man it mga raya ro andang gastos bangud sa baratong rate it mga hotels.
Samtang sa pihak nga parte, ginpahayag man ni Mayor Bautsita nga sa makarun hay una eun lang sa 7 percent ro turistang nagabisita sa Boracay.
Base sa datos it Malay Tourism Office may una eamang nga kapin sa 400 ka mga local tourist ro andang nailista kada adlaw nga kaabuan hay maghalin sa National Capital Region (NCR).
Nasayuran nga mas manaba raya kumpara sa 6,000 tourist nga nailista ko nagtaliwan nga dag-on sa kapareho man nga buean.
Samtang, nagapabilin man nga ro kinahangean agud nga makasueod sa Isla it Boracay hay ro negatibong resulta it RT-PCR test nga ginbo-oe sa sueod it 72 oras , QR code ag kinahangean man nga magpakita it pamatuod it booking sa sangka hotel.
