KALIBO, Aklan — Masobra sa 300 nga mga participants halin sa nagkaeain-eain nga mga barangay sa probinsiya it Aklan ro nagtambong sa tatlong adlaw nga Liga ng mga Barangay Congress ko nagtaliwan nga domingo sa Davao City.
Suno kay Punong Barangay Neil Candelario it Poblacion Kalibo ag nagatindog man nga Liga ng mga Barangay President sa banwa it Kalibo nga naging madinaeag-on ro nasambit nga pagtililipon nga ginaeakipan it mga barangay captains, barangay kagawad, pilang empleyado it barangay ag Sangguniang Kabataan ukon SK officials.
Raya hay ginpangunahan sigon ni Provincial Liga ng mga Barangay President Ralf Tolosa it banwa it Malay.
Naging dinapit nga bisita sa ginpatigayon nga congress si Senador Bong Go ag ro national president it Liga ng mga Barangay.
Sa ginpatigayon nga forum, pila sa mga speakers nga gin-imtahan ro nagtalakay angot sa disaster preparedness, gender and development, ag fiscal management it barangay .
Nag-tour man sigon sanda sa siyudad agud nga masayuran ro mga best practices kara nga pwedeng mai-apply sa Aklan partikular sa andang natungdan nga barangay .
Ginpasiguro man nana nga magatrabaho pa sanda it mayad agud nga mapa-improve ro serbisyo nga ginatau it mga barangay functionaries nga andang natun-an halin sa mga trainings ag seminars nga ginturo it mga speakers sa ginpatigayon nga congress.
Sa pihak nga parte, ginatutukan makaron it konseho ro declogging ag paglimpyo sa mga drainage sa banwa it Kalibo bilang pagpahaum sa tiempo it tig-ueuean.
Malipayon man sanda bangud nga paga-umpisahan eon ro massive flood control project sa Aklan agud nga malikawan ro grabeng pagbaha.
