KALIBO, Aklan—Ginlunsar it Philippine National Police (PNP) ro “Ligtas SumVac (Summer Vacation) 2022.”
Raya hay bilang kaparte it new normal sa tyempo it tag-init kung siin ginaeauman ro pagdagsa it mga turista.
Suno kay Police Major Willian Aguirre it Aklan Police Provincial Office (APPO) nga magatukod sanda it pilang ka mga police assistance desk eabi eon sa mga lugar nga maabu nga tourist attractions.
Tuyo sigon kara nga masigurong euwas ro mga turista kamana man nga mapadumduman sanda kung paano mkaangkon it euwas nga bakasyon.
Nasayuran nga ginpagguwa ni PNP Chief Police General Dionardo Carlos ro operational guidelines para masiguro ro minimum public health standards, katawhayan ag kaayusan eabi eon sa tourist destinations ukon mga simbahan.
Ginaeauman sigon it mga otoridad ro mas mabahoe nga numero it mga tawo matapos ro daywang dag-on nga quarantine restrictions sa nasyon.
Samtang, ginmanduan man ro mga unit ag estasyon it pulisya nga makipag-angot sa community-based volunteers ag force multipliers sa mga ginadagsa nga tourist destination kamana man ro Department of Tourism (DOT) ag counterparts para masiguro ro kaeuwas it mga turista kapareho it pagpatigayun it mobile patrols ag police visibility sa mga matawo nga lugar partikular sa mga terminal.
