KALIBO, Aklan — Nagapati ro pamilya it sangka 60-anyos nga lolo nga owa it natabu nga foul play sa pagkamatay kara.
Suno kay Eljhon Yacub, unga it biktimang si Elpidio Yacub nga imaw mismo ro nakadiskubre sa eawas it anang ama nga owa eon it kabuhi samtang nga nakahapa sa fishpond nga anang ginabantayan bandang ala-1:30 it hapon it Miyerkules, Agosto 28 sa Brgy. Tagbaya, Ibajay.
Kumbinsido sigon sanda nga owa it foul play ukon anumang makadueuda sa anang pagkamatay.
Matapos nga mahaw-as halin sa tangke sa katung-anan it mabaskog nga uean, gaob ag matig-a eon sigon ro anang eawas rason nga posibleng mabuhay eon raya nga nakababad sa tubi.
Ginkumpirma nga may hypertension ro biktima rason nga posibleng inatake it anang sakit samtang nga nagapamilapil.
Ginapatihan nga matapos nga atakehon it anang sakit hay nahueog raya sa tangke ag naeumos.
Ginsaysay pa ni Yacub nga temprano pa nag-agto sa tangke ro anang ama ag nangawa sanda bangud nga owa raya naka-abot sa nakasanayan nga oras it anang pag-uli rason nga anang gin-usoy.
Una karang nakita ro bolo it anang ama ag pagkatapos hay anang eawas.
Insigidang gindaea it rumespondeng tawuhan it MDRRMO-Ibajay ro biktima sa Ibajay District Hospital apang gindekarang dead-on-arrival it nagtatap nga doktor .
