NATIONAL News — Nagpaguwa it show cause order ro Land Transportation Office (LTO) kontra sa kilaeang female motorcycle vlogger nga si “Yanna” matapos nana nga buyayawon ag magpakita it dirty finger sa sangka pick-up truck driver sa Zambales.
Suno kay LTO Chief Vigor Mendoza II, ginapa-usisa eon nana kon dapat nga suspindihon ukon bawion ro lisensya ni Yanna bangud sa pagiging “improper person to operate a motor vehicle.”
Si Yanna hay may 435,000 followers sa social media.
Base sa viral video nga gin-usisa it LTO, ginpakita ni Yanna ro anang dirty finger sa pick-up driver nga gin-akusahan nana nga reckless magmaneho. Nag-atubang pa ro daywa ag nagbaeayluhan it mga maeain nga tinaga maskin pa nga nagpangayo eon it eksplinasyon ro eaeaki.
Ginpamilit it LTO, bilang sangka influencer, dapat kunta hay gingamit ni Yanna ro anang plataporma para isueong ro responsableng pagmaneho ag kaeowasan sa karsada.
Maskin nga nagpangayo eon it pasaylo ro vlogger hay pagapadayunon sa gihapon it LTO ro imbestigasyon.
