KALIBO, Aklan—Gina-eauman nga mapun-an eon ro kapin sa P12 bilyon pesos nga lugi sa ekonomiya partikular sa industriya it turismo tuga it Covid-19 pandemic sa uman nga pagbukas it isla it Boracay sa mga turista.
Raya hay kasunod sa naging tikang it Boracay Inter-Agency Task Force ukon BIATF kon sa siin ginapasugtan eon ro mga lokal nga turista nga residente it Western Visayas nga makabisita sa Boracay.
Suno kay Malay Mayor Frolibar Bautista, mabahoe raya nga bulig sa uman nga pagbuhi sa ekonomiya it probinsya it Aklan kamana man sa pangabuhian it mga pumueoyo sa tunga it pakikipagsukoe sa pandemya.
Samtang, kapin man sa P47 bilyon pesos ro kalugihan sa mga negosyo nga nagtuga it kawad-an it trabaho sa mga empleyado kasunod it pagsarado it mga establisyimento.
Sa uman nga pagbukas it Boracay hay gin-engganyo ni Tourism Secretary Bernadette Romulo-Puyat ro mga accommodation establishments nga magsumiter it letter of intent to operate.
Kaangot kara, hasta ko adlaw it Huwebes hay 90 letters of intent pa eamang ro nabaton it lokal nga gobyerno it Malay halin sa kabilugan nga 390 accredited establishments nga may una sa isla.
Nauna eon nga gin-insister it alkalde nga hugot nga igapatuman ro minimum health protocols kaparehas it mandatory nga pagsuksok it face mask, pag-obserba it physical ag social distancing kamana man ro proper hygiene para makalikaw sa makamaeatay nga sakit.
