KALIBO, Aklan—Nakaangkon it mabahoe nga buho ro lumang tulay nga naga-konekta sa banwa it Kalibo ag Numancia bangud sa naexperiensiyahan nga mabaskog nga uean ag maeapnagon nga pagbaha kahapon daea it bagyong Paeng.
Suno kay Engr. Joey Ureta, hepe it maintenance engineer it Department of Public Works and Highways ukon DPWH-Aklan nga nagapatigayon eon sanda it assessment sa nasambit nga lugar.
Raya hay makit-an sa bukana it tulay sa may Brgy. Bulwang kon sa siin ro anang tinabuan hay ginkabkab it tubi-baha.
Paunang plano nanda nga butangan it temporary support and protection ro apektadong parte it tulay agud nga mabutangan it tambak.
Engkaso nga insigidang mag-abot ro gin-request nga emergency response fund ag magiging available ro tanan nga kinahangeanon nga mga materyales kamana man nga maging mayad ro daeagan it tiempo hay paga-umpisahan ro repair ag ginaeauman nga matapos sa sueod it daywang adlaw.
Suno kana nga ginbutangan anay it kordon ro lugar agud nga ibawae ro pag-agi it mga tawo ag saeakyan.
Samtang, ginlaygayan ro mga apektadong motorista nga gamiton ro bag-ong construct nga Kalibo-Numancia bridge 2 nga kaiping eamang it lumang tulay.
Ro 430-meter nga kongkretong tulay hay makabig nga pinakamagueang sa nasyon nga gintukod antes ro World War II.
Sa makaron hay sigidas ro andang pagtipon it mga impormasyon sa iba pang mga imprastraktura nga nagkaeasamad para sa igasumiteng damage assessment report.
Ginatutukan man nanda ro mga aspaltadong karsada nga nagkaeasamad tuga it grabeng baha.
