KALIBO, Aklan—Nagtuga it koeba ag grabeng kahadlok sa mga Overseas Fililipino Workers (OFWs) ro natabo nga mabaskog nga pagsabog sa Beirut, Lebanon.
Suno kay Bombo International Correspondent Jenelyn Recasas Ta-ay, sa sueod sigon imaw kahapon it saeakyan kaibahan ro anang amo kat matabo ro pagsabog.
Nagapauli eon kunta sanda kat makabati sanda it mabaskog nga pagsabog.
Ginapahayag dugang ni Jenelyn nga anang nasaksihan ro pag-aso halin sa sangka warehouse it mga paeupok.
Bangud kara, pareho sigon sandang nagpanic it anang amo ag owa sanda kasayod kung ano ro andang pagahimuon.
Kaangot kara, gin-abisuhan man sigon sanda nga isarado ro andang mga bintana bangud ginasugid nga may kemikal ro aso nga tuga it pagsabog.
Nasayuran nga naga-abot sa 2,750 tonelada it ammonium nitrate ro an-om nga dag-on eon nga sa seuod it warehouse ag owa it maskin anong safety measures.
Hasta makarun hay owa pa it klaro nga detalye ro gobyerno kung siin ag paano naghalin ro pagsabog.
