KALIBO, Aklan—Mag-eowas nga apektado it importasyon, naga-aray pa gid ro pilang mga mangunguma it sibuyas sa Gabaldon sa probinsiya it Nueva Ecija bangud sa pagkalugi matapos nga mabahaan ro andang mga tanum nga sibuyas.
Raya ro ginpahayag sa Bombo Radyo Kalibo ni Imelda Luz, tag-ana it taeamnan it sibuyas sa nasambit nga lugar.
Suno kana nga haeos an-um nga ektarya nanda it taeamnan it sibuyas ro nabahaan tuga it mabaskog nga pag-uean kapin sa daywang domingo eon ro nakataliwan daea it low pressure area.
Bangud kara, imbes nga 2,000 sacks it produkto ro andang ginaeauman nga ma-harvest hay kapin sa 500 sacks eon lang ro andang posibleng mapuslan.
Nakataeana kunta nga paga-anihon andang mga tanum nga sibuyas sa buean it Marso ag Abril, apang bangud nga naeumos sa baha hay maswerte eon kon maka-ani sanda it 50 porsiyento it andang tanum.
Maskin sigon ro andang tanum nga paeay hay owa pa na-harvest matapos man nga maeumos it tubi-baha.
Mag-eowas kara, ginpahayag ni Luz nga posible pang igabagsak nanda ro presyo it andang produkto sa pag abot it mga imported nga sibuyas.
