KALIBO, Aklan—Bukon eamang it ro nababatyagan nga epekto makaron it El Niño ro dapat nga pahauman, kundi ro magiging epekto man it La Niña nga ginaeauman nga maga-umpisa sa ulihing parte it 2024.
Suno kay provincial board member Nemesio Neron, chairman it committee on disaster preparedness nga kinahangean raya nga pahauman kapareho it pagpahaum sa epekto it El Niño.
Dapat eon sigon nga makaangkon it plano sa pagbaha ag iba pang kalamidad ro natungdan nga ahensiya it gobyerno ag maskin ro mga pumueuyu agud nga maamligan ro propiyedad, pananum ag kabuhi.
Sa pihak nga parte, pagagamiton nga basehan it Aklan ro Heat Index it Iloilo.
Raya hay base sa pag-inquire it Tactical Emergency Operations Center it MDRRMO Kalibo sa PAGASA Iloilo Radar kun sa siin ginlaygay nga gamiton ro Iloilo bilang baseline.
Raya hay bangud nga ro Hydromet Station sa ASU Banga hay under construction pa ag ro dati nga Automated Weather Station sa old Capitol Skating Rink hay owa eon naga-gana ukon ginbo-oe eon.
