KALIBO, Aklan—Magiging mabug-at nga paeas-anon sa mga maisot nga negosyo kun paga-obrahon nga mandatory ro pagtau it 14th month pay sa mga empleyado.
Raya ro ginpahayag it sangka ekonomista ag educator sa probinsiya it Aklan nga si Mr. Ramon Quimpo.
Raya hay kasunod it pagdihon sa Kamara ni Kabayan party-list Rep. Ron Salo it House Bill No. 520 nga nagatuyo nga obligahon ro gobyerno ag pribadong sektor nga magbayad it 14th month pay sa tanan nga mga empleyado, anuman ro andang status sa trabaho.
Suno kay Quimpo nga owa pa eubusan nga nakabangon halin sa epekto it COVID-19 pandemic ro mga maisot nga kompanya rason nga mabudlayan sanda nga magtau it 14th month pay.
Dapat suno kana nga taw-an it ligwa kara ro mga negosyante nga makapagdesisyon.
Raya hay magadepende kon mabaskog ro andang negosyo ag makasarang nga magtau it 14th month pay.
Apang kon obrahon nga requirement, mabudlayan ro mga raya eabi eon ro mga MSMEs.
Sa pihak nga parte, ro positibong epekto sigon it nasambit nga benepisyo hay makapataas sa morale ag productivity it mga empleyado.
Sa idaeum it proposisyon, ro 14th month pay hay dapat nga itau sa November 30 kada dag-o ukon antes ro nasambit nga petsa.
Ro kantidad it 14th month pay hay indi dapat magnaba sa monthly basic salary it sangka trabahador.
