KALIBO, Aklan—Nakalista it kapin sa 495 tourist arrivals ro Malay Municipal Tourism Office halin ko Agosto 1 hasta it 9, 2020.
Ro nasambit nga numero hay mga turista maghalin sa mga kaeapit nga probinsya sa Western Visayas.
Halin kat nagbukas ro isla sa mga taga-region VI hay nagkumahog man ro mga hotels and resorts nga makaangkon it Certificate of Authority to Operate ukon Provisional Certificate of Authority to Operate nga gina-isyu it Department of Tourism ukon DOT agud nga pasugtan ro mga raya nga makaoperate it andang negosyo sa tunga it ginapangatubang nga pandemya.
Base sa datos, 157 accommodation establishments nga may 3,320 available rooms ro nakabueo pa eamang it CAO hasta ko Agosto 10,2020.
Ro mga magabisita sa isla hay kinahang-ean anay nga magcomply it mga ginapatuman nga health protocols agud nga malikawan ro pagkalhit it coronavirus disease ukon Covid-19.
Raya hay ginakaeakipan it mandatory nga pagsuksok it face masks, pag-obserba sa physical distancing, pagfill-up it health declaration form ag ro pagrehistro sa andang identity kon gusto nga magpaligos sa dagat.
Nag-extend man ro naga-iral nga curfew sa isla nga naga-umpisa it alas-11:00 it gabie hasta it alas-4:00 it aga-aga agud nga taw-an it kahigayunan ro mga bisita nga makalibot-libot it mabuhay-buhay sa sikat nga isla.
Nasayuran nga ro Boracay ro may mabahoe nga amot sa ekonomiya it nasyon kon sa siin ro nagapanguna nga traditional markets hay ro mga turista maghalin sa South Korea, China ag Taiwan.
Bangud sa pandemya hay uwa it maskin sambilog kanda nga nakasueod sa isla halin kat ginpatuman ro mga lockdowns sa nasambit nga nasyon ag ro Pilipinas hay naghimo man it kaparehong tikang agud nga malikawan ro pagkalhit it makataeapon nga sakit.
Apang, sa pinakaulihing datos it Department of Health, ro Pilipinas hay nakalista gihapon it kabilugang 161,253 COVID-19 cases sa pihak it mga ginapatuman nga health protocols ag quarantine measure.
