KALIBO, Aklan–Nagahueat pa it “go signal” ro Malay Municipal Police Station halin sa pamilya it daywang turista nga nasapwan nga owa it kabuhi sa sueod it sangka hotel room sa Barangay Balabag sa isla it Boracay para ipaidaeom sa autopsy ro mga bangkay.
Ro mga biktima hay parehong 44 anyos kun siin sangka Filipino ro eaeaki ag Australian citizen ro babaye nga mga residente tanan it Metro Manila.
Ginpahayag ni Police Lieutenant Colonel Don Dicksie De Dios, hepe it Malay Municipal Police Station nga nag-abot sa isla ro mga biktima ko Marso 13.
Ro kwarto sigon kung siin sanda nasapwan hay pangatlong kwarto eon nanda nga gintiniran.
Nadiskubre sigon ro bangkay matapos nga usisaon it housekeeping personnel ro kwarto ag dikara nakit-an nga nagahamyangon eon sa saeog ro mga biktima.
Bangud kara, inisgida sigon nanda nga ginpahisayod sa security ag management it hotel ro hitabo kamana man nga nagtawag it police assistance.
Ro bangkay it mga biktima hay una eon sa sangka punerarya kun siin gin-impormahan eon ro tagsa nanda ka mga pamilya.
Sa makaron hay nagapadayun pa ro imbestigasyon it pulisya angot sa insidente.
