KALIBO, Aklan—Mas pang ginpabaskog it Malay Municipal Police Station ag iba pang law enforcement unit ro andang pagbantay para sa Barangay ag Sangguniang Kabataan ukon SK Elections 2023.
Suno kay P/Lt.Col. Dainis Amuguis, hepe it Malay PNP Station nga nakadeploy ag haom eon ro mga board of election tellers, mga manugturo ag mga kapulisan sa haeos 17 nga voting centers sa Malay humalin kaina it alas-7 it agahon.
Ginpaathag ni PLt.Col. Amuguis nga ro Brgy. Manocmanoc ro may pinakamaabu nga botante nga naga-abot sa 16,000 sa nasambit na banwa.
Dugang pa kara nga nagdugang sanda it mga deployment ag augmentation halin sa Philippine Army.
Sa pihak nga parte, ro mga turista ukon mga bisita hay dagsa eun sigon apang uwa pa naabot ro gin-ekspektar nanda nga numero bangud sa posibilidad nga prayoridad nanda ro pagboto.
Nagapati man si Amuguis nga maga-abo ro tourist arrival pagkatapos it adlaw it eleksyon.
Uwa man sigon sanda it mga namonitor nga mga isyu ukon pag-eabag may kaangtanan sa eleksyon.
May pilang nag-eabag sa liquor ban apang natigayon man nga naayos.
Nasayuran nga ro mga nasambit nga tikang hay may kaangtanan sa gihapon sa pagpabaskog it pwersa it kapulisan makaron nga eleksyon.
Padayon gihapon ro anang pagpadumdom angot sa mga bawae nga ubrahon bago, samtang ag pagkatapos it eleksyon.
