KALIBO, Aklan—Gin-alerto it Malay Tourism Office ro publiko sa nagakalhit makaron nga pekeng travel agency nga naga-offer it mga nakaka-engganyo nga travel package sa baratong kantidad paagto sa isla it Boracay nga owa man it kamatuoran.
Suno kay Malay tourism officer chief Felix delos Santos nga pilang mga turista nga na-scam ro nagdangop sa andang taeatapan.
Pila suno kana sa nasambit nga mga turista hay nakatau it full-payment ag down payment nga naga-abot it P200,000 pesos, P100,000 pesos ag P50,000 pesos.
Sa pag-check sigon nanda sa Department of Tourism hay bogus ukon bukon it accredited ro mga raya ag sa pag-trace hay indi makita ro andang address sa banwa it Malay ag isla it Boracay.
Para sa kasayuran it publiko, ginpangaeanan ni Delos Santos ro mga peke nga travel agency nga ginaeakipan it BOD travel and tours ukon package tours online; travel zone Philippines; biyahero travel and tours ag Hanna travel and tours.
Ginpahayag dugang nga sa oras nga may mabiktima hay insigida sanda nga nagabaylo it features partikular ro pangaean sa social media eabi eon sa facebook kun sa siin maabu sanda nga mga followers.
Nagapabaylo-baylo suno kana it pangaean ro mga illegal nga online travel agency apang sambilog eamang ro operator.
Nauna eon nga nagpaguwa it advisory ro Malay tourism office agud nga makatau it paandam sa mga turista kontra sa mga travel agencies nga bogus ukon bukon it accredited sa DoT.
Dismayado si Delos Santos bangud nga ginasamad it mga pekeng tour operator ro imahe it Boracay kun sa siin owa sigon nanda ginakonsinti ro mga makarondaya nga online travel agency.
Nasubuan suno kana imaw sa mga na-scam nga turista bangud nga haeos pilang buean nanda nga ginaplano ro bakasyon, apang sa ulihi hay mabuking nga ginloko eamang sanda.
Pila sa mga turista hay owa nakasakay it eroplano samtang ro iba maskin nga naka abot sa Boracay hay nadiskubrehan nga owa it akomodasyon.
