BORACAY, Island — Uman nga gin-engganyo it Malay Tourism Office ro publiko nga mag-avail eamang it mga accredited tourist services ag mag-subscribe sa mga masaligan nga source makaron nga tiempo it bakasyon.
Suno kay Kathrine Licerio, tagapaghambae it Malay Tourism Office nga ugalion nga kon magpa-book hay ususyon ro mga hotels and resorts nga accredited it Department of Tourism.
Ginpaandaman man kara ro publiko nga maging madahan sa mga owa na-verify nga impormasyon sa social media agud nga malikawan nga mabiktima it mga scam nga ro target hay ro mga turista, kapareho it pekeng accommodation, travel ticket, vacation deal, ag iba pa.
Nasayuran nga ko nagtaliwan nga dag-on hay nagpaguwa it paandam ro PNP Anti-Cybercrime Group kasunod it pagtaas it vacation ukon travel accommodation scams kun sa siin may pilang turista nga nagbakasyon sa isla ro nabiktima.
Nadiskubre eon lang it mga biktima pag-abot sa lugar nga ro andang reservations hay owa naga-exist sa system it establisimento nga anda kunta nga pagadayunan.
Sa pihak nga parte, gin-imbitahan nana ro tanan nga uman nga makisadya sa andang Love Boracay version 5 makaron nga dag-on kun sa siin ro mga aktibidad hay maga-umpisa sa Abril 25 hasta sa Mayo 5.
