Importante ro pag-angkon it malimpyo nga palibot para sa ikaayong eawas it kada pumueoyo.
Raya hay naga-umpisa sa pag-angkon it banyo it kada panimaeay.
Sa raya nga pamaagi hay posibleng malikawan ro pilang ka mga sakit, pagkontamina it gina-inom ukon ginagamit nga tubi ag ginabue-an it pagkaon.
Ginpahayag ni Dr. Christine Marie Tatud, Rural Health Physician nga base sa datus kapin sa 2.4 billion nga tawo sa bilog nga kalibutan ro owa it access sa basic sanitation kapareho it banyo.
Nagaguwa man nga naga-abot sa 892 million it populasyon sa kalibutan ro nagahigko sa guwa ukon owa nagagamit it banyo.
Haeos 1,000 suno kana nga mga unga ro nagakamatay kada dag-on sa bilog nga kalibutan bangud sa diarrhea.
Pila pa sa mga sakit nga pwedeng maangkon sa kawad-an it tama nga sanitation ag hygiene hay ro cholera, polio ag maabu nga iba pa.
Agud nga makalikaw sa mga sakit, siguraduhon nga malimpyo ro palibot eabi eon ro ginagamit nga banyo.
Regular raya nga limpyuhan, butangan it bastante nga tubi ag sabon.
Importante sigon nga hugasan it mayad ro alima pagkatapos nga maghigko ag maggamit it banyo.
