KALIBO, Aklan—Nagapadayun pa ro imbestigasyon it Malinao PNP angot sa nasapwan nga bangkay sa kagueangan nga sakop it Sitio Fatima Hills, Brgy. Bulabod, Malinao.
Madumduman nga nagaka-agnas eon kat makit-an ro bangkay it biktimang si Lauro Fernando, 55 anyos, residente it nasambit nga lugar.
Suno kay PLT Merriefin Carisosa, hepe it Malinao Municipal Police Station, base sa inisyal findings, ro naging rason sigon it kamatayon it biktima hay bangud sa pilang ka mga tama it pag-eabo sa eawas.
Padayun sigon nanda nga ginatukib ro kada anggulo sa krimen kamana man ro posibleng motibo ag kun sin-o ro may kahimuan sa krimen.
Gin-aku man ni Carisosa nga nabudlayan sanda sa pag-imbestiga bangud naga-isaeahon eamang ro biktima nga naga-istar sa anang panimaeay.
Dugang pa kara nga owa it kaeapit baeay ro biktima ag owa man it nakaaway sa andang barangay.
Ulihi sigon nga nakita it anang mga kasimaryo si Lauro ko Agosto 29 apang makataliwan ro limang adlaw hay nasapwan eon lang ro bangkay kara nga una eon sa state of decomposition ko Setyembre 3.
