KALIBO, Aklan—Ginpull-out eon ro mga barangay checkpoints kasunod sa pag down grade pa gid sa modified general community quarantine ro bilog nga probinsya it Aklan.
Suno kay Terrence Jun Toriano it Municipal Disaster Risk Reduction Management Council ukon MDRRMC-Kalibo, kinahang-ean nga sundon gihapon ro mandatory ag proper nga pagsuksok it face mask, i-practice gihapon ro social distancing nga kapin sa sang metro ro antad sa kada isaea ag inde gihapon kapanaw ro naga-edad it 21-anyos panaba kamana man 60-anyos pataas.
Ginpahayag dugang ni Toriano nga amat-amat eon nga ginapasanay ro publiko sa ginatawag nga new normal pagkatapos it pandemya.
Nasayuran nga sa executive order number 25 series of 2020 nga ginpirmahan ag ginpaguwa ni Aklan Governor Florencio Miraflores, mas kapin pang ginhaeogaan ro paghueag it publiko apang kinahang-ean nga sundon gihapon ro pila ka mga restrictions nga ginapatuman.
Ro curfew hay gin-adjust sa alas-9:00 it gabie hasta it alas-5:00 it aga-aga samtang ro mga essential establishments hay pwedeng mag-operate halin it alas-8:00 it agahon hasta it alas-6:00 it gabie.
