KALIBO, Aklan—Nagapadayun ro manhunt operation it mga otoridad sa daywang magmaeanghud nga ginadudahan nga gun runner matapos nga makapaeagiw sa ginpatigayon nga buy-bust operation sa Brgy. Toledo sa banwa it Nabas.
Ro mga suspek nga magmaeanghud nga naga istar sa nasambit nga lugar hay owa anay ginpangaeanan bangud sa nagapadayun nga operasyon.
Suno kay P/Major Gilbern Banderado, hepe it criminal investigation and detection group ukon CIDG-Aklan nga may nabaton sanda nga impormasyon nga nagabaligya it baril ro daywa rason nga insigidang ginkasa ro buy-bust operation it mga operatiba apang kat ginpaguwa it mga suspek ro ginabaligya nga baril hay natunugan it mga raya ro pag-aresto kanda rason nga natigayon nga makapaeagiw.
Kabisado sigon it mga raya ro lugar nga medyu mabukid rason nga owa eon sanda natigayon nga maeagas ag madakpan.
Sangka pulis ro nagpakuno-kuno nga buyer, kun sa siin, may naka-abang raya nga back-up nga maeapit man sa lugar.
Narekober sa operasyon ro buy-bust item nga 45 kalibre nga baril ag may extra nga magazine.
Ro daywa hay posibleng magapangatubang sa kasong illegal possession of firearms and ammunitions ag pagbaligya it illegal firearms.
Padayun man ro imbestigasyon it mga otoridad angot sa mga parokyano it mga suspek.
