KALIBO, Aklan—Ginkwestyon it Manibela transport group kon ham-an it uwa ginapatuman ro memorandum circular kon sa siin nakabaehag nga kon may pagtaas sa presyo it produktong petrolyo hay otomatiko man nga magataas ro pamasahe sa pampublikong jeepney depende kon pila ro gintaas sa presyo it langis.
Suno sa chairman it grupo nga si Mar Valbuena, maeain ro boot kanda it mga sumaeakay bangud sa andang aplikasyon sa hirit it dugang nga panueoktan sa pamasahe bangud nga sanda mismo ro naga-apply ag nagademand kara.
Sa kamatuoran suno kana hay kapin sa P200 pesos ro naduea nga kita sa kada adlaw nanda nga pagpamasada bangud sa sigidas nga pagtinaas it presyo it langis.
Inde man sigon pwede nga mag-extend sanda it byahe agud nga eagson ro naduea nga kita bangud nga magkaproblema man ro andang ikaayong eawas.
Apela nanda sa gobyerno nga taw-an sanda it igtaeopangod bangud nga ro fuel subsidy nga P6,500 pesos nga ginata-o kanda hay bukon it bastante kon ikumpara sa sunod-sunod nga pagsaka sa presyo it produktong petrolyo.
Nauna eon nga ginpahayag it Land Transportation Franchising and Regulatory Board (LTFRB) nga pagatun-an nanda ro hinyo nga dugang nga P2 sa pamasahe sa jeep it mga transport groups.
Nasayuran nga kahapon nga adlaw it Martes, ginpatuman ro P1.90 nga pagsaka sa presyo it gasolina samtang 1.50 man ro gintaas sa diesel kamana man P2.50 mat-a sa kerosene.
