Magahiwat it prayer vigil ro Archdiocese of Manila para sa eaging pagmayad ni Pope Francis makaron nga adlaw it Byernes, Pebrero 21.
Angot kara, ginasampit it Archdiocese ro publiko nga maki-intra sa igapatigayon nga prayer vigil sa Manila Cathedral sa Intramuros, Manila.
Sa sangka statement, hinambae it Archdiocese nga bilang sabat sa panawagan ni Archbishop Charles John Brown, ro Apostolic Nuncio to the Philippines, nga ipangamuyo ro madasigan nga pagrekober it Santo Papa pati eon man ro tanan nga mga doktor ag nurses nga naga-alaga kana, ginaengganyo it mga mananampalataya nga maki-intra sa prayer vigil para kay Pope Francis sa oras nga alas-5 it hapon.
Nauna eon man nga nagpanawagan si Manila Archbishop Jose Cardinal Advincula sa tanan nga mga parokya ag komunidad sa Archdiocese of Manila nga mag-organisa it Holy Hour for the Healing of the Sick eabi eon para sa Santo Papa.
Nagpanawagan man si Archbishop Advincula sa mga mananampalataya nga mag-alay it personal ag family prayers para sa parehong intensiyon.
Presenta nga naka-confine ro 88-years old pontiff sa Gemelli hospital sa Roma matapos ma-diagnose nga may double pneumonia nga nagapangahueugan nga apektado ro pareho nanang baga.
