Ginhangkat it sangka mamalidha sanday Pangueong Ferdinand Marcos Jr. ag Bise Presidente Sara Duterte-Carpio nga isurender eon lang ro bilyun-bilyong haega it kontrobersyal nga confidential, intelligence fund sa 2023 para aktwal nga mapusean it publiko.
Raya ro ginpahayag ni House Deputy Minority leader ag ACT Teachers party-list Rep. France Castro, raya sigon hay eabi eon gid ag magapaskwa eon sa tunga it haeos 14-year high nga inflation rate.
Pilang buean eon sigon nga ginabatikos ro proposisyong P4.5 bilyon para sa intelligence ag confidential funds para sa Office of the President sa masunod nga dag-on.
Mag-eowas pa raya sa P500 milyong confidential funds nga gustong itaeana sa Office of the Vice President.
Madumduman nga una eon nga ginbuhinan it maghalin sa P150 milyon nga naging P30 milyon eon lang , rason nga gin-realign sa operating budget it taeatapan Si Duterte, ro sekretaryo it DepEd.
Kontrobersyal ro confidential ag intel funds bangud sa malisod raya nga iga-audit, krason para magduda ro mga tawo kung siin gid man iga-taeana ro nasambit nga kantidad.
Mag-eowas sa pagkabaeaka sa katiwalian, ginakabaeaka man it mga grupo nga magamit raya pang-surveillance apisar sa mga civilian agencies kapareho it DepEd.
