SHOWBIZ News — Nagtaliwan sa pihak nga kinabuhi ro kilaeang Pilipina nga chef nga si Margarita Forés sa edad nga 65.
Nasapwan si Forés nga owa it alintro sa anang hotel room sa Hong Kong matapos nga owa nakatambong sa sangka lunch meeting, ko Martes, Pebrero 11.
Naaywan nana ro anang unga nga si Amado. Owa pa ginpaguwa ro kabangdanan it anang kamatayon.
Nag-post ro anang unga nga si Amado nga kasosyo man it anang ina sa negosyo it mensahe sa social media “ Dear Friends and Family, It is with a heavy heart that I share the sudden passing of my Mom, Margarita A. Forés. Our family is mourning this unexpected loss, and we kindly ask for your prayers during this time. We will be able to share more in due time.”
Natawo si Forés sa Pilipinas ag nagsaylo sa New York City kaibahan ro anang pamilya kat imaw hay dalagita pa eamang.
Ro anang edukasyon sa Amerika ag Pilipinas nga gin-eakipan it anang pagpalangga ag pagbiyahe sa Italya ro nagtau kana it ideya nga buksan ro Cibo, sangka Italian restaurant ko 1997 sa Pilipinas.
Ro Cibo hay nag-umwad bilang sangka chain it pasta ag pizza nga may 30 nga lokasyon sa bilog nga nasyon.
Nasayuran nga daywang beses nga nagmadinaeag-on si Forés kontra sa kanser kaibahan ro thyroid cancer ko 2006.
Ko nagtaliwan nga domingo eamang hay na-feature ag naging cover it Tatler magazine si Margarita ag ro anang unga nga si Amado.
