KALIBO, AKLAN— Nakaangkon it meeting si Department of Environment and Natural Resources (DENR) Secretary Roy Cimatu sa Local Government Unit (LGU) Malay kahapon nga adlaw.
Apang, suno kay Mr. Rowen Aguirre, Executive Assistant Office of the Mayor nga owa imaw it idea kun ano ro nangin topiko bangud nagtambong man imaw sa conference kasunod it pagpadueong sa isla it Boracay ni Gen. Oscar Lactao, Commander it Central Command Office.
Dikara sigon gin talakay ro mas pang hugot nga pagpatuman it seguridad sa isla kasunod it naga kinatabong gulo sa ibang parte it nasyun partikular eon sa Mindanao.
Ginsekyar man sigon it nasambitan nga opisyal ro mga preparasyon nga gina hiwat sa isla sa isyu it seguridad kamana man nga nagpangayu it update angot sa gin tukod nga Joint Task Force Boracay.
Samtang, gin kumpirma man ni Aguirre nga sa pinakaulihing record it otoridad, naga abot sa 81 nga evacuees eon ro nag abot sa Boracay nga gin paidaeum eon sa profiling it kapulisan agud masiguro nga owa sanda it nakaibahan nga wanted sa andang lugar.
Aminado man si Aguirre nga naga kabaeaka sanda nga mag inabo ro mga refugees sa isla bangud sa maka-dugang sigon raya sa problema it Boracay sa solid waste nga tuga it pagginutok sa isla.
Suno pa kana nga ro Boracay hay sangka tourist area ag owa naka-designar para sa mga refugees.
