Kalibo Aklan ——-Nagakabaeaka ro mga locals nga maeapit sa ginakabig nga Holy Ganges River sa Allahabad, India sa pag-eotaw pa it mas maabong mga bangkay it mga namatay sa coronavirus kadungan sa pag-umpisa it seasonal monsoon flooding.
Suno sa opisyal it holiest city it Hindu nga Allahabad, ginatantyang 600 ka bangkay it mga biktima it deadly virus ro gin-eobong sa suba.
Pagtantya it mga local sa lugar nga bukon pa it raya ro kabilugang numero it mga bangkay nga nakaeobong idto ag nagakabaeaka nga mas maabo pa ro madiskubrehan bangud sa mabaskog nga current tuga it monsoon flooding.
Nahadlok man ro mga residente nga kon inde mabueo ro mga bangkay, magatuga raya it mas mapeligrong sakit ag pagkakontaminado it nasambit nga suba nga sambilog sa ginakabig nga pinaka-polluted nga suba sa bilog nga kalibutan.
Madumduman nga pilang mga pamilya it mga namatay sa COVID-19 sa kasagsagan it outbreak ko April ag May halin sa North ag East India ro gin-eobong it andang pinalangga sa kabuhi sa balaan nga suba ukon gin-eobong sa riverbanks bangud inde nanda masarangan ro gastuson para sa funeral pyres ukon cremation.
