LOCAL News — Nakataeanang magpanupod ro provincial government it Aklan it ayuda sa mga rice farmers nga eubus nga naapektuhan it tigmaeaea daea it pagpanaeasa it El Niño sa nasyon agud nga makabulig nga makabangon halin sa pagkalugi.
Suno kay Provincial Agriculture Office head Engr. Alexys Apolonio nga bangud nga ginpaidaeum ro Aklan sa state of calamity hay posibleng maka-access it kapin sa P8 million nga pondo ro andang taeatapan sa quick response fund halin sa Calamity Fund it probinsiya .
Bangud sa kaabuon it mga mangunguma nga nagdeklara it andang kapiyerdihan, masyadong manaba ro nasambit nga budget.
Bangud kara, naisipan nanda nga bak-eon eon lang ro kantidad it mga binhi ag abono agud nga magtueueupod ro mga na-identify nga apektadong mangunguma.
Sa pihak nga parte, ginapahauman eon it Provincial Agriculture Office ro pagpanupod it calamity assistance nga P10,000 sa mga recipients it Presidential Assistance for Fisherfolk, Farmers and Families nga ginbaton ni Governor Joen Miraflores halin kay Presidente Ferdinand Marcos Jr., sa anang pagbisita sa probinsiya it Antique ko nagtaliwan nga buean nga naapektuhan it El Niño phenomenon.
Gina-validate eon sigon makaron ro listahan it mga beneficiaries it Department of Agriculture ag Department of Social Welfare and Development ukon DSWD .
Posible suno kana nga makaron nga domingo hay matumod eon ro mga beneficiaries kara kun sa siin may tentative date eon man para sa distribution.
May posibilidad sigon nga ro mga indi makabaton nga naeakip sa listahan hay mataw-an gihapon it ayuda bangud nga nag-request eon sanda it dugang nga funding sa Office of the President.//
