Matapos nga nagpakuno-kuno nga na-kidnap ag nagpangayo it ransom sa sariling pamilya, Koreano nagpiyansa eon
KALIBO, Aklan — Nakapagpiyansa eon it P2,000 ro sangka Koreano matapos nga kasuhan it unjust vexation kasunod it anang pagpakuno-kuno nga imaw hay na-kidnap ag nagpangayo it ransom sa anang kaugalingon nga pamilya.
Ko Sabado hay naaresto ro Koreano nga si Yoo Jin Won, 38, sa baeay it anang nobya sa Brgy. Camanci Norte, Numancia, Aklan matapos nga magpangayo it bulig ro Korean Embassy sa Anti-Kidnapping Group (AKG) angot sa gina-alegar nga pagka-kidnap it sangka Koreano sa nasyon.
Suno
sa mga ginikanan ni Yoo, nagpangayo sigon kanda it ransom nga kapin sa $5,000 ukon katumbas it P250,000 ro mga
nagkidnap sigon sa anang unga.
Sa ginpatigayon nga cyber research sa Facebook account it Koreano, natumod ro ginakahimtangan it Koreano.
Nakipag-angot sa Numancia Police Station ro team nanday P/Maj. Nestor Acebuche it Anti-Kidnapping Visayas Field Unit para sa rescue operation.
Kat maaresto, ginsaysay it Koreano nga nagahinangae eamang imaw ag naisipan ro kidnap-me modus matapos nga maduea-an it trabaho bilang tour guide sa Angeles, Pampanga.
