BURUANGA, Aklan — Ginkumpirma ni Buruanga Mayor Concepcion Labindao nga pahapyaw nga nag-open-up kana ro andang MLGOO-Officer nga si Leda Candelario Cenon pilang adlaw antes nga natabu ro krimen nga matsa gusto eon nana nga magsurender sa andang relasyon it anang live-in partner nga si Ritchan Bartolome, administrative aid it munisipyo .
Suno kana nga sa pilang dag-on nanda nga nakatrabaho si Cenon hay mataeupangdan nanda kon may problema ro daywa, apang kapareho it sangka normal nga relasyon hay natigayon man nga maayos.
Nagakanugon man imaw sa pagkamatay it daywa bangud nga parehong close kana ro nasambit nga mga empleyado ag mahugod sa trabaho.
Kada makita sigon nana sa facial expression ni Cenon nga may problema hay pilit nanda raya nga ginalibang .
Samtang, antes sigon nga namatay ro andang MLGOO officer hay nag-overtime pa raya ag gintapos ro andang report nga igasumite sa office of civil defense angot sa kahalitan nga gintuga it bagyong kristine sa andang banwa nga grabeng nadaeasa it bagyo.
Nasayuran nga sa haeos 11 anyos nga naka-assign si Cenon sa LGU Buruanga hay kapamilya eon ro andang pagtrato kara ag palangga imaw it tanan nga mga empleyado bangud sa anang pagiging mabinuligon ag dedicated sa trabaho partikular sa pag-comply it andang mga requirements.
Owa man napugngan ni mayor labindao nga maging emotional sa pagdumdum sa kamaeayran ni Cenon ag ni Bartolome.
Madumduman nga ro daywa hay parehong nasapwan nga patay nga may igo it bala sa dughan sa sueod it kotse ni Cenon kahapon it hapon sa kilid it karsada sa Brgy. Panilongan, Buruanga.
