KALIBO, Aklan—Ginkumpirma it Municipal Disaster Risk Reduction and Management Office ukon MDRRMO Kalibo nga may pilang residente sa Sitio Libuton B sa Brgy. Bakhaw Norte, Kalibo nga nag-eabag sa quarantine measures.
Suno kay MDRRMO Kalibo head Terrence June Toriano nga gin-abisuhan eon nana ro barangay council agud nga hugtan ro pagbantay partikular sa andang gina-agyan sa kaaromahan eabi eon kon manabaw sigon ro tubi sa suba.
Ginpadumdum pa nana nga sa makaron hay padayun pa nga ginapatuman ro granular lockdown sa daywang sitio sa nasmabit nga barangay bangud nga owa pa nagguwa ro swab test result it 172 nga mga residente nga nakaangkon it direct contact sa andang kasimaryo nga staff it provincial hospital nga nagpositibo sa covid 19.
Ro kumpirmasyon pa eamang sigon makaron it Department of Health hay local transmission sa lugar ag owa pa ro ginakahadlukan nga community transmission.
Samtang, uman nga ginpadumdum ni toriano sa publiko nga likawan anay ro magwinarang kon owa man lang it importanteng paeanawon eabi eon ro mga naga-edad it 20 anyos panaba nga mahilig magwarang ag mga senior citizens nga vulnerable sa sakit.
Sa makaron hay padayun suno kana nga nakapaidaeum ro Aklan sa modified general community quarantine ukon MGCQ.
