KALIBO, Aklan—Haum eon ro lokal nga gobyerno it Kalibo sa pagsabat sa posibleng epekto it La Niña phenomenon sa nasyon, suno sa sangka tawuhan it Municipal Disaster Risk Reduction and Management Office ukon MDRRMO-Kalibo.
Suno kay Michael Vincent Castro it MDRRMO Kalibo nga dere-deretso ro andang monitoring sa daeagan it paniempo halin sa nagkaeain-eain nanda nga sources eabi eon sa state weather bureau nga PAGASA.
Bangud nga catch basin ro banwa it Kalibo, partikular nanda nga ginatutukan ro water level sensor nga naka-install sa banwa it Libacao ag Madalag it PDRRMO-Aklan.
Na-identify eon man sigon nanda ro mga manaba ag baeahaon nga lugar sa banwa it Kalibo nga ginaeakipan it Mobo, Tinigao, Estancia, Bakhaw Sur ag Norte ag portion it barangay Poblacion.
Dugang pa nga may mga action ag contigencies plans ro LGU angot sa La Niña.
Sa pihak nga parte, ginpahayag dugang ni Castro nga natigayon eon nanda nga ma-testing ko nagtaliwan nga mga inadlaw ro bag-o nanda nga kagamitan nga daywang water vessels.
Igadeploy sigon nanda sa barangay Caano ag Mabilo para sa selebrasyon it kapistahan ni San Juan de Bautista para sa search and rescue operation .
Sarang kara nga makasakay ro sangka operator, sangka medic, daywang swimmer ag paga-eowason nga biktima.
