KALIBO, Aklan–Maabu nga mga Aklanon ro nagaeaum nga matalakay ni Pangueong Ferdinand “Bongbong” Marcos, Jr. ro anang mga plano sa ekonomiya ag iba pang mga isyu nga nakaka-apekto sa pagpangabuhi it ordinaryong Pilipino sa anang kauna-unahan nga State of the Nation Address ukon SONA sa Lunes, Hulyo 25.
Ginpangutana it bombo radyo ro pilang pumueuyu angot sa mga polisiya ag isyu nga kinahangean nga mataw-an it prayoridad ni Marcos sa anang kauna-unahan nga SONA.
Suno sa negosyanteng si alyas Joy nga gusto nana nga mabatian ro angot sa anang plano sa ekonomiya eabi pa ag padayun ro pagsinaka it inflation rate it nasyon.
Nagaeaum man imaw nga matuman ni Marcos ro anang plano nga mataw-an it katumanan ro anang campaign promise nga mapanaba ro presyo it bugas sa 20 pesos kada kilo.
Dapat man sigon nga mapa-utang sanda it gobyerno nga may manaba nga interes bilang dugang nga kapital sa andang maisot nga negosyo.
Ginaduso man nana nga maibalik eon ro face to face classes it mga estudyante sa pagpati nga owa naging madinaeag-on ro distance learning.
Sa pihak nga parte, ginpahayag man ni alyas Joseph, sangka tricycle driver sa banwa it kalibo nga kinahangean nga tutukan ni Marcos ro pagpanaba sa presyo it produktong petrolyo bangud nga naga-angkon raya it domino effect sa inflation ag pagtaas sa presyo it mga nagapangunang baeak-eon.
Nagaeaum man imaw nga maitau eon kanda ro ginpromisa nga fuel subsidy agud nga mapahagan-hagan ro epekto it mataas nga presyo it langis.
