Kalibo Aklan ————Nakataeana nga igapaidaeum sa swab test ro mga indibidwal nga nakaangkon it close contact sa mga nailistang pasyente nga nagpositibo sa delta variant it coronavirus disease (COVID-19) maghalin sa banwa it Kalibo.
Suno kay Kalibo Mayor Emerson Lachica nga sa makarun hay naka-isolate eun ro mga raya samtang ginahueat pa ro resulta it andang test.
Samtang ginpahayag man si Lachica nga maskin nakalista eun it 21 ka mga kaso it delta variant it COVID-19 ro probinsiya it Aklan hay magapabilin sa gihapon ro ginapatuman nga Modified Enhanced Community Quarantine (MECQ).
Samtang, gin-extend pa hasta alas-5 ro operasyon it mga business establishment nga maging epektibo kung makapaguwa eun it Executive Order (EO) si Aklan Governer Florencio Miraflores.
Samtang sa pihak nga parte nakabatun man ro Local Government Unit (LGU-Kalibo) it kapin sa 2 Milion pesos maghalin sa Special Assistance for Individuals in Crisis Situation (AICS) nga gintao ni Congressman Carlito Marquez pamaagi sa DSWD Region 6.
Bangud kara makabatun sigon ro mga Barangay Tanod, Barangay Nutrition Scholar, ag Barangay Health Worker it tig 2,000 pesos.
Kaparte sa gihapon raya it tikang nga ginahimo it LGU agud nga makontrol ro pagtinaas it kaso it COVID-19 kamana man ro pagkilaea sa mga tawo nga nagahimakas sa pakikipag-atubang sa pandemya.
