Nagapadayun ro imbestigasyon it mga awtoridad may kaangtanan sa posibleng rason it sunog nga sumamad sa mga nakahilira nga mga establisimento nga naga-renta sa sangka multi business center sa Barangay Bulwang, Numancia, bandang alas-9:00 it agahon it Miyerkules, Mayo 29, 2024.
Suno kay Fire Officer 2 Adrianne Villas it Bureau of Fire Protection ukon BFP-Numancia nga ginatan-aw pa nanda kon faulty electrical wiring ro rason it sunog.
Nagpadaea eon sigon sanda ko Huwebes, Mayo 30 it pilang samples it natipon nanda nga electrical wiring sa fire laboratory services it BFP-Region 6 kun sa siin ro resulta hay posibleng magguwa tatlo hasta ap-at nga domingo.
Samtang, nag-abot sa P43.5-milyon ro kabilugan nga kahalitan sa pagkasunog it business center nga may eapad nga masobra sa 8,000-square meter nga ginapanag-iyahan ni Engr. Sutico Beltran.
Umabot suno kana hasta sa fourth alarm ro sunog nga gindeklarang fire control bandang alas-10:21 it agahon ag eubusan nga natapna bandang alas-11:42 it agahon.
Nagresponde sa insidente ro mga bumbero halin sa Kalibo, Nabas, Malinao, New Washington, Libacao, Balete, Banga, Makato ag Ibajay kamana man ro mga emergency responders it MDRRMO Kalibo ag Numancia ag mga volunteers.
Owa it casualties sa natabu nga sunog.
Ginpahayag suno kana it pilang testigo nga ro kaeayo hay naghalin sa likod nga parte it istraktura.
Sa pihak nga parte, ginkumpirma ni FO2 Villas nga ro establisimento nga totally burned hay ro Japan Surplus Center samtang ro partially damaged hay ro Barbaza Multi-purpose Cooperative, sangka motorcycle dealer and repair shop ag sangka glass and aluminum shop.
Ro insidente hay nagtuga man it grabeng trapiko sa kalibo-Numancia bridge nga kun sa siin ko ulihi hay ginlaygayan ro mga motorista nga mag-divert sa Lezo-Tigayon bridge.
Uman man nga ginpadumdum ni FO2 Villas ro publiko nga pirmeng isipon ro mga fire safety tips agud nga makalikaw sa sunog sa baeay ag mga workplaces.
