KALIBO, Aklan — Pilang adlaw antes ro uman nga pagbukas ko isla it Boracay, makaron pa eamang hay nagakumahog eon ro pilang hotels ag resorts nga magpatindog it kaugalingong sewage treatment plant (STP).
Suno kay Jojo Tagpis, operations manager it Boracay Tubi System Inc., kapin sa 62 establishimento ro nagpadueong sa andang taeatapan para sa pagpaobra it STP, sambilog sa mga requirement agud maging compliant sa environment laws ag makadungan ro operasyon sa reopening it isla.
Ginpahayag pa kara nga maabo sa mga negosyante ro nagpatindog it kaugalingong STP kaysa mag-clustering sa kabaeaka nga magka-problema sa ulihi kapin eon ro dugang sa baeayran.
Base sa ginpaguwang Memorandum Circular No. 2018-006 ni Environment Secretary Roy Cimatu, obligado ro mga resorts, hotels ag kaparehas nga establisiemento nga may 50 kwarto ukon masobra pa nga makaangkon it kaugalingong STP samtang ro may 49 kwarto panaba hay pwedeng maggamit it clustered STP.
Ginklaro ni Tagpis nga kinahang-ean gihapon nga magkonekta sa sewer line ro mga nagpa-install it STP kasunod sa patakaran it Environmental Management Bureau (EMB).
