KALIBO, Aklan— Plano makaron it Bureau of Animal Industry – Veterinary Quarantine Service sa probinsiya it Aklan nga makipagpueong sa mga resort ag hotel owners sa isla it Boracay agud nga ibawae anay ro pagtau it pagkaon sa mga baboy nga nakokolekta halin sa mga nabilin nga pagkaon it establisyimento.
Raya hay kasunod sa pagkumpirma ko Lunes it Department of Agriculture (DA) nga 14 sa 20 sample it dugo it baboy nga gin-usisa hay nagpositibo sa African Swine Fever (ASF).
Suno kay Dr. Christine Lynn Melgarejo, Veterinarian-Quarantine Officer it Bureau of Animal Industry nga tuyo kara nga malikawan nga makasueod sa Aklan ro ASF.
Hugut sigon ro pagbantay makaron it ginbilog nga Local ASF Task Force-Aklan sa implementasyon it one entry, exit policy sa isla.
Kun anu sigon ka-instrikto ro pagbantay sa Kalibo International Airport hay makarondaya man ro ginapatuman sa Caticlan jetty port.
