KALIBO, Aklan—Ginplastar it lokal nga gobyerno it Kalibo ro pila sa mga ginabawae sa selebrasyon it Kalibo Señior Sto. Niño Ati-Atihan Festival 2025.
Suno kay sangguniang bayan member Ronald Marte, chairman it committee on tourism, culture and arts nga pila sa mga ginabawae hay ro pagdaea it backpack ag tote bag sa festival zone area, mag eowas eon lang kung may daea ro mga ginikanan nga gamit para sa andang unga, ag sa mga drummers nga nagadaea it bag para butangan it andang gamit, apang raya hay igapaidaeum gihapon sa inspection bago pasudlon.
Ginabawae man ro mga debotelyang ilimnon, mga mataeum nga hinganiban, armas ag makahaealit nga chemicals nga mahimo makahalit sa iba.
Bawae man ro paggamit it red, blue, ag green lasers.
Bawae man ro mga unauthorized ambulant vendors sa sueod it festival zone ag ginabawae nga butangan it mga vendors ro prente it St. John the Baptist Cathedral.
Sa pihak nga parte, umpisa Enero 13 hasta 19 hay igapatuman ro No Parking Zone sa festival zone area sa tanan nga mga saeakyan, mag-eowas eamang sa mga firetruck, ambulansya, rescue vehicles, police patrol, ag mga saeakyan nga ana it LGU Kalibo ag iba pang concerned agencies.
Nauna eon nga ginpaabot it LGU nga ginduea eon ro car pass rasun nga indi makasueod ro mga private vehicles, mag-eowas sa mga may pwesto sa sueod it festival zone.
