KALIBO, Aklan– Haeos fully booked eon ro tanan nga mga hotel ag inn sa banwa it Kalibo, Aklan para sa selebrasyon it Sto. Niño Ati-atihan Festival 2019.
Sa interview it Bombo Radyo kay Kalibo Sto. Niño Ati-atihan Festival Inc. (KASAFI) Chairman Albert Meñez, sa pihak sigon nga punuan ro nasambitang mga establisyemento hay maabo gihapon ro nagatawag ag nagapareserve para eamang masaksihan nanda ro dag-unang festival nga ginakabig nga “Mother of All Philippine Festival”.
Para eamang maaccomodate ro mga turistang gustong makisadya, gin-organisa nanda ro “home-stay program” kon siin nagausoy sanda sa makaron it mga bakanteng apartment ukon baeay nga temporaryong madayunan it mga dumueoong nga bisita sa short period of time nga pagstay sa Kalibo.
Ginaeauman eon sigon nanda ro pagbuhos it mga turista halin sa nagkaeain-eain nga nasyon nga gustong masaksihan ro makolor ag masadyang long weekend festival.
Ro nasambitang festival hay maga-umpisa sa Enero 14-20, 2019 kon siin pagapartisiparan raya it masobra sa 63 mga tribu ag grupo nga makipagkompetisyon sa tamboe it mga drums sa mga nagapangunang karsada sa banwa.
