Ginhanduraw it pilang mamamahayag it Associated Press ro andang naging eksperyensiya kat masaksihan ro September 11, 2001 terrorist attacks sa New York City, 25 anyos eon ro nagtaliwan matapos ro trahedya.
Kaibahan kara si AP reporter Karen Matthews, nga ko ratong adlaw it pag-atake hay naga-asikaso sigon imaw sa anang tatlong dag-on nga unga para sa pagsueod sa preschool kat mabatian ro mabaskog nga pagsabog. Nasaksihan nana ro pagbunggo it ikaywang hijacked plane sa South Tower, antes nga eubusan nga nahugos ro daywang tore.
Haeos 3,000 nga katawo ro namatay sa World Trade Center, Pentagon ag sa ap-at nga gin-hijack nga eroplano.
Samtang, ginboe-an man it AP photographer Richard Drew ro eksena it pag-atake, kaibahan ro kontrobersyal nga litrato nga ginatawag nga “The Falling Man.” Ginpakigbahin man it iba pang AP journalists ro andang mga eksperyensiya kaibahan ro pag-eowas sa tunga it nagakahugos nga edipisyo, paghueat sa mga survivor nga owa eon nag-abot sa ospital, ag uman nga pagkita it mag-amang magseparar sa tunga it kinagamo.
Bente-singko anyos matapos ro trahedya, ginpahayag it mga mamamahayag nga nagapabilin sa andang huna-huna ro mga tunog, litrato ag epekto it 9/11, samtang ginakilaea nanda ro andang naging papel sa pagdokumento sa sambilog sa pinakamabahoe nga trahedya sa kasaysayan it Estados Unidos.
