KALIBO, Aklan — Posibleng paga-atubangon anay ni Kingdom of Jesus Christ (KOJC) leader Apollo Quiboloy ro mga kaso nga ginpasaka kontra kana sa Pilipinas antes nga ikonsidera ro extradition sa Amerika .
Raya ro ginpahayag ni dating provincial board member ag political analyst sa Aklan nga si Atty. Harry Sucgang.
Suno kana nga kon maserbisyuhan eon ni Quiboloy ro anang sentensiya sa mga kaso nga ginapangatubang sa nasyon hay posibleng i-extradite imaw sa US .
Apang raya hay nakadepende sa pag-istorya sigon it daywang nasambit nga nasyon .
Madumduman nga nag-atubang ko Biyernes, Setyembre 13 ro ‘self appointed son of God’ sa daywang magkaseparadong arraignment ukon pagbasa it akusasyon kontra kana kasunod it pagka-aresto sa pastor ko adlaw it Dominggo, Setyembre 8.
Si Quiboloy hay nagapangatubang sa tatlong kaso nga may kaangtanan sa child abuse, sexual abuse, ag qualified trafficking nga ginpasaka sa korte it Pasig City ag Quezon City nga dating ginpasaka sa Davao City Regional Trial Court apang ginsaylo it Supreme Court kasunod it apela it Department of Justice.
Gindeklara man imaw bilang most wanted it Federal Bureau of Investigation (FBI) para sa mga kasong may kaangtanan sa sex trafficking, fraud, ag cash smuggling.
Sa makaron hay indi pa matumod kon siin igakulong si Quiboloy.
Apang nakadepende eon sigon sa judicial system it nasyon ro paghimo it nagakaigo nga aksyon.
