KALIBO, Aklan—Bangud nga kaeabanan sa mga kaso nga ginakaeakutan it riding in tandem sa Aklan hay owa naresolba, ginaduso makaron ni sangguniang panlalawigan Nemesio Neron, chairman it committee on peace and order nga makaangkon it madaeuman nga imbestigasyon angot kara.
Suno kana nga ro Aklan hay sambilog sa mga matawhay ag may seguridad nga lugar sa mga pumueoyo nga maabi-bihon.
Nag-umpisa eamang suno kana ku 2004 ro mga motorcycle riding suspects nga nagapamatay sa probinsiya, kun sa siin unsolved ro ibang kaso.
Kaibahan sigon sa mga kilaeang personalidad nga nabiktima it motorcycle riding suspects sa Aklan hay sanday Atty. Edgar Calizo, Bombo Boy Hinolan, ag maabong iba pa nga pinatay mismo sa andang mga residensya ukon sa publiko.
Kadungan kara, target nanda nga ipatawag sa inquiry ro Aklan Police Provincial Office, LGU’s, CIDG ag iba pang natungdan nga ahensiya it gobyerno para makahimo it legislative measures.
Nagapati imaw nga halin sa ibang mga lugar ro mga motor riding suspects, apang may mga tumandok man.
Gin-engganyo man ni SP Neron ro tanan eabi ro media ag kapulisan nga magbueuligan para maresolbar ro makarondaya nga klase it pagpamatay.
Madumduman nga sangka negosyante nga nagahingaean kay Ryan Relator ro pinakaulihi nga pinatay ku mga motor riding suspects sa Aklan.
